Јас сум Горица Фердинанди, одделенски наставник во ООУ „Ѓорѓи Сугарев“ од Битола. За себеси би кажала дека сум едукатор, кој многу си ја сака својата професија, позитивна, комуникативна и секогаш подготвена да го прошири своето знаење и да примени нешто ново во наставата со цел подобрување на личниот и професионалниот развој.

Како едукатор, на своите ученици секогаш се обидувам да им ги направам часовите интересни и креативни каде учењето се темели на учење преку игра, истражување, меѓусебно помагање и почитување. Преку интеракција со учениците, ги мотивирам со обиди и грешки да доаѓаат до заклучоци без да се плашат да го кажат своето мислење. Така ги поттикнувам да истражуваат, да учат и да го применат наученото, кое се продлабочува во трајно знаење. Честопати организирам интересни работилници за екологијата, со цел да ја поттикнам свеста на учениците, повеќе да се грижат за здрава и чиста средина, а со тоа да бидат и добри екологисти.

Ме привлече концептот на ЕДУИНО, бидејќи имав можност да дадам придонес да ја збогатам ризницата со едукативни игри со кои ќе се поттикнува креативноста кај децата. Им препорачувам на колегите наставници да се охрабрат и да дадат свој придонес кон збогатувањето на библиотеката со игровни едукативни активности и да се приклучат во ЕДУИНО заедницата.

Како ЕДУИНО Амбасадор иднината ја гледам со понатамошно усовршување и применување на стекнатите техники и стратегии во процесот на образование.

ЕДУИНО за мене претставува платформа каде преку соработка и споделување идеи и искуства со колегите ќе го подобриме процесот на образование.

Богата ризница на едукативни содржини, игри и активности.