Јас сум Маринела Готак, вработена како педагог во ЈОУДГ „Ацо Караманов“ во Радовиш. Би се опишала себеси како личност која си ја сака и цени работата и во се што прави вложува многу позитивна енергија, ентузијазам и љубов.

Предучилишните установи се место каде мора да постои постојана комуникација и соработка меѓу трите главни чинители: кадарот, родителите и децата. Како стручен работник се залагам за тимска работа со колешките од градинката и пошироко и секогаш сум отворена за соработка, помош или поддршка. Во поглед на родителите градам односи на отворена комуникација и доверба за да можеме секој предизвик да го решиме во најдобар интерес на детето. Во работата со деца се трудам да бидам добар пример пред сè, бидејќи децата учат од нашата целокупна појава, а не само од она што сакаме ние возрасните да ги научиме. И јас како педагог се развивам и учам од сите, од колешките, од родителите, а многу работи учам и од најмалите.

Мотив да се вклучам во ЕДУИНО заедницата ми беше моја пријателка која побара идеи и материјали за родители кои сакале да работат активности со своето дете. Ме израдува фактот што и покрај современиот начин на динамично живеење, имаме родители кои сакаат да поминуваат квалитетно време со своите деца, но им требаат идеи и поддршка. Ѝ ја предложив платформата ЕДУИНО за Ран детски развој, но забележав дека базата со активности би можела да биде побогата. Како мајка, и јас со моето дете дома работам разни активности и сакав истите да ги споделам со останатите заинтересирани родители. Од друга страна, игровните активности за во градинка сметам дека ќе им бидат од помош на сите воспитувачи кои сакаат да внесат идеја плус во работењето.

Образованието е темел на иднината на еден народ. Мора да бидеме позитивни и да гледаме со оптимизам кон иднината, но исто така да бидеме реални за моменталната ситуација, која може и треба да се подобрува. Сметам дека треба да се врати почитта кон просветните работници, а за тоа треба сами да се избориме со постојано вложување во работата, професионален развој и достоинствено однесување.

ЕДУИНО за мене претставува алатка за подобрување на работата, меѓусебна поддршка и соработка.

Несебично споделување идеи.